Nakaangkon na sa License to Operate isip usa ka Blood Bank ang Zamboanga del Norte Medical Center.
Kini ang nasayran gikan ni Dr. Esmeralda Nadela, ang Acting Hospital Administrator sa Zamboanga del Norte Medical Center.
Ang maong License to Operate giluwatan ni Atty. Nicolas Lutero III, ang Director sa Health Facilities and Services Regulatory Bureau sa Department of Health gikan Enero 1 hangtud Disyembre 31, niining tuiga.
Sa maong kalambuan, gipamahayag ni Dr. Nadela nga ang Blood Bank makakolekta ug maka-screen na sa dugo ilabi na sa lima ka TTIs o Transfusion Transmissible Infection sama sa Hepatitis B ug C, HIV, Syphilis ug Malaria ug dili na kini ipadala ngadto sa ubang laboratories alang na sa screening.
Dugang ni Dr. Nadela nga kung adunay Blood Bank, ang supply sa dugo kaigo na aron gamiton sa mga pasyente sa probinsya sa Zamboanga del Norte.
Lakip sa nahimong importansya sa Blood Bank, mahilakip na kini sa Zamboanga Peninsula Blood Services Network uban sa Certificate of Inclusion.
Kung adunay emerhensiya, makakuha na ug dugo gikan sa ubang blood banks ug makahatag usab sa laing blood banks.
Si Dr. Nadela ang nagkanayon usab nga ang Zamboanga del Norte maoy pinaka-aktibo nga probinsya kalabot na sa blood letting activities ning panahon sa pandemya.
Kini ilang gipasalamatan ang local government units kinsa nagpakabana sa importansya sa Blood Donation.
Ingon man, ang Blood Bank usa ka life-saving tungod kay makahatag ug maka-paambit ug dugo ngadto sa pasyente nga nanginahanglan niini.
Samtang sa nahilambigit nga kalambuan, nakabaton na ug Antimicrobial Resistance Surveillance Program (ARSP) Accreditation ang maong tambalanan alang sa Bacteriology Laboratory human kini nakapasar sa Proficiency Test (PT) nga gihimo kaniadtong bulan sa Oktubre sa miaging tuig sa score nga P88.62%.
Gipasigarbo ni Dr. Nadela nga sa 42 ka partisipante sa tibuok nasud, 11 lamang ang mipasar sa maong pasulit.
Ingon man ang nakabentaha sa ARSP Accreditation nga ang mga tambal nga anaa sa Philippine National Drug Formulary (PNDF) o mga antibiotic nga gamiton alang sa grabe nga infection, ang magamit na usab kini sa Zamboanga del Norte Medical Center ug dako na kini’g ikatabang sa mga pasyente sa Zamboanga del Norte.
Nasayran nga ang Zamboanga Medical Center maoy bugtong tambalanan lamang dinhi sa probinsya, Zamboanga del Sur ug Zamboanga Sibugay ang nakaangkon sa ARSP Accreditation.
(Provincial Information Center-mbmontederamos)