28.6 C
Manila
Friday, March 29, 2024

State Of The City Address Sa Dakbayan, Malampusong Gipahigayon

- Advertisement -

Malampusong gipahigayon ang State of the City Address kon SOCA ni City Mayor Hon. Darel Dexter T. Uy didto sa Zamboanga del Norte Convention and Sports Center ning dakbayan kaniadtong Marso 30, adlaw’ng Martes, ning tuiga sa may alas 2:00 sa hapon. Ang maong kalihokan gipasundayag pinaagi sa usa ka Livestream sa City Government of Dipolog Facebook Page.

Ang maong kalihokan gipahigayon atol sa 92nd regular session sa Sangguniang Panglungsod ug gitambongan nila ni ZN Provincial Governor, Hon. Roberto Y. Uy, ZN Provincial Vice Governor, Hon. Senen O. Angeles, iyang inahan ug kanhi mayor sa dakbayan, Ms. Evelyn T. Uy, mga personahe sa pipila ka mga ahensya sa gobyerno lakip na ang Philippine National Police, mga punong barangay ug mga miyembro sa barangay council

Lakip usab sa mitambong ang mga miyembro sa Sangguniang Panlalawigan, mga miyembro sa hudikatura, representates sa nagkalain-laing kahugpungan ug organisasyon sa dakbayan sama sa Sangguniang Kabataan Federation NGOs, Civil Society ug People’s Organizations ug mga opisyales ug empleyado sa lokal nga kagamhanan sa dakbayan. Human giablihan ang sugyot kon agenda sa SP 92nd regular session, diha-diha gisugdan ang paghatod ni Mayor Uy sa iyang State of The City Address.

Tipik sa mensahe ni Mayor Uy ang pagtan-aw balik sa mga panghitabo sa miaging tuig partikularmente na ang nahitabong pandemya ug ang mga lakang ug aktibidades nga gihimo sa Lokal nga Kagamhanan inubanan sa tabang ug suporta sa mga pipila ka mga ahensya sa gobyerno ug nagkalain-laing kahugpungan ug organisasyon aron sa pagdumala nga maminusan ang pagkaylap niini.

Lakip usab sa gisaysay ni Mayor Uy ang mga kalampusan nga nakab-ot sa Kagamhanang Lokal bisan pa sa panahon sa pandemya partikularmente na sa Panglawas ug Nutrisyon, “Social Welfare” ug sa Edukasyon, partikularmente na ang pakigtambayong sa DepEd nga mamugna ang SMILE TV nga usa ka pamaagi aron mahatagan ug kalidad nga edukasyon ang mga estudyante bisan pa sa panahon sa pandemya.

Gitapos niya ang iyang mensahe sa pag-ambit sa iyang pag-laum nga mamahimong mauswagon ang dakbayan human sa pandemya ug ang pag-awhag nga magkahiusa ang katawhan alang sa kalamboan ug kaayohan sa dakbayan.

Usa ka “video presentation” sa mga panghitabo, kalampusan ug umaabot nga plano alang sa dakbayan sa Dipolog ang gipasundayag human sa mensahe ni Mayor Uy ug natapos kini pinaagi sa pagkuhag mga hulagway sa mga mitambong sa nasangpit nga kalihokan. (City Information Office-jnp)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -