Magpahigayon og libreng specialized medical consultation ang Provincial Government of Zamboanga del Norte pinaagi sa ZNMC Medical Team ug One Stop Assistance Center alang sa mga pasyente nga adunay sakit sa kasingkasing, baga, ug mga ugat, lakip ang mga nagpailalom sa dialysis.
Gikatakdang ipahigayon ang kalihokan sa Pebrero 19, 2026, alas 8:00 sa buntag sa Outpatient Department sa Zanorte Medical Center sa Sicayab, Dipolog City. Una moabot, una maasikaso ang sistema sa pagdawat sa mga pasyente.
Moadto isip visiting specialists sila Dr. Michael Burdador, Vascular ug Cardiac Surgeon, ug Dr. Paolo Martin Serios, Vascular ug Thoracic Surgeon aron maghatag og eksperto nga konsultasyon ug tambag medikal.
Sumala sa probinsyal nga panggamhanan ubos ni Darel Dexter Uy, tumong sa inisyatiba nga mapalapit ang dekalidad ug espesyal nga serbisyo panglawas sa katawhan, ilabi na sa mga nanginahanglan og dugang nga pag-atiman. Giimbitar ang publiko nga moduol sa ZNMC Medical Team Office o sa OSAC Office sa Provincial Capitol alang sa dugang detalye.(JENIFFER JR. DELICA)
Source: Zamboanga del Norte Medical Team