Gipasalamatan ug gipahalipayan sa syudad pinaagi sa City Veterinary Office ang 11 ka mga local lechoneros sa Cagayan de Oro nga misalmot sa Search for the Best Lechon in Cagayan de Oro `Lechoneros Encuentros Dos’ bag-ohay lamang.
Si City Veterinarian Dr. Perla Asis, Dep’t Manager sa City Veterinary Office namahayag nga ang Yoyong Lechon ang mikampeyon ug midawat sa premyo nga ₱ 15,000 cash ug plaque; 1st runner up ang J-Coys Lechon nga nakadawat og ₱ 10,000 cash prize; ug ang 2nd runner up ang Zaldy’s Lechon nga midawat sa premyo nga ₱ 5,000. Samtang midawat og ₱ 2,000 matag usa wala napili isip consolation prize.
Matud ni Asis aron usab matilawan sa katawhan ang kalami sa lechon sa tulo ka mananaog gihatagan sila og higayon nga makabaligya diha sa city hall mini park. Busa giaghat ang mga mahiligon sa lechon ug gusto motilaw sa lamian nga lechon nga modalikyat lang sa mini park.
Ang `Lechoneros Encuentros Dos’ inabagan usab sa B-MEG.
Nunot niini, gipasalamatan ni Dr. Asis ang San Miguel Corporation sa pagpaluyo sa maong kalihokan ug ilabina si Mayor Rolando `Klarex’ Uy nga hugot nga nagsuporta sa mga programa ug kalihokan sa City Veterinary Office.
(Source: CIO-Cagayan de Oro, photo courtesy by Reynan Baylin)