Gilusad kagahapong adlawa, 29 April 2021, ang Shared Service Facility (SSF) on Mobile Mariculture Platform ilawom sa Department of Trade and Industry’s (DTI’s) “Balik Probinsya Program”. Highlight sa gihimong kalihukan ang pormal nga pag-blessing ug cutting of ribbon sa Magsaysay Fisherfolks Association (MAFIA) Norwegian fish cage nga mao’y pinakaunang nakabenepisyo niini nga programa. Gipahigayon ang mubo nga seremonya sa D’Hangovers Restobar, Barangay Magsaysay, Dinagat.
Tumong niini nga programa nga matabangan ang gagmay nga negosyante sa ilang negosyo hangtod nga mapalambo kini ilabi na ang ilang abot nga kita aron mas madasig sila sa pagpanginabuhi sa maayo nga pamaagi. Napili sa DTI ang MAFIA gumikan sa gipakita nilang kasibot ug kadasig ilabi na sa mga membro niini nga mamuhi ug isda sa maayo nga pamaagi nga dili makaapekto sa kinaiyahan. Sigon pa ni DTI OIC-Provincial Director Elmer M. Natad nga dako ang ilang kadasig nga matabangan ang mga micro, small, and medium enterprises (MSMEs) sama sa MAFIA diin nagsugod kini sa gamay hangtod nga modako kini pinaagi sa ilang kakugi ug paningkamot.
Malipayon ang mga myembro sa MAFIA nga nahatagan sila ug susama niini nga oportunidad isip dugang kapanguhaan sa ilang inadlaw nga panginabuhian alang sa ilang pamilya. Bisan pa man sa mga kakulian nga ilang gisagubang mahitungod sa pandemya sa COVID-19 wala kini nahimong babag aron ipadayon ang ilang tumong ug tinguha sa pagkab-ot sa katumanan sa ilang pangandoy alang sa ilang asosasyon.
Kini nga kalihukan namugna sa pakigtambayayong sa nagkadaiyang ahensya sa gobyerno sama sa DTI, Department of Labor and Employment (DOLE), Bureau of Fisheries and Aquatic Resources (BFAR), Department of the Interior and Local Government (DILG), Hinatuan Passage Development Alliance (HIPADA), ug Provincial Government ilawom sa pagdumala ni Governor Kaka Bag-ao nga gipasiugdahan sa Office of the Provincial Agriculturist (OPAG), Provincial Labor, Employment, and Manpower Office (PLEMO), Provincial Community Affairs Office (PCAO), Provincial Cooperative Development Office (PCDO), ug Provincial Tourism and Cultural Office (PTCO). Anaa usab ang presensiya sa representante nga gikan sa congressional office.
Mipakita sa ilang dakong suporta sila Board Member Lyn Dialde (District 1), Dinagat Vice Mayor Petnel Sombrado kauban ang pipila ka mga Sangguniang Bayan Members, ug Magsaysay Barangay Captain Rufina Esmeralda ngadto sa mga fisherfolk.
(Source: Dinagat Islands Provincial Information Office Facebook page)