Nagpaubos si Lapulapu City Mayor Junard “Ahong” Chan sa tulo-ka-adlaw nga home quarantine samtang nagpaabot sa resulta sa pagpahiling sa iyang swab sample gahapon sa buntag.
Ang mga tinugyanan sa panglawas sa Lapulapu mikuha og swab sample ni Chan para ipaubos sa testing sa coronavirus disease kun Covid 19.
Matod ni Chan, mogawas ang resulta sa test paglabay sa tulo ka adlaw.
Gipasabot ni Chan nga iya kining gihimo aron pagseguro sa iyang kabaskog ug safety ilabi na nga siyay nangunay pagpanghatag og mga ayuda sa nagkalisod-lisod nga mga Oponganon panahon sa ECQ kun enhanced community quarantine para kapugngan ug kalikayan ang pandemic.
Miingon ang mayor nga gitambagan siya nga magpabilin lang sa balay samtang maghuwat sa resultado.
Giawhag usab niya ang mga Oponganon nga mouban aniya pag-ampo nga negatibo ang resulta sa iyang swab test.
Bisag ubos sa kwarantina, gipasalig ni Chan nga magpadayon siya pagserbisyo pinaagi sa emergency hotline.
Ang mga emergency hotline sa Lapulapu mao ang 0961-731-7999 ug 0961-729-3000 sa Smart; 0916-704-0391 ug 0916-441-6690 sa Globe; 0932-104-1164 sa Sun; ug 340-2124 sa landline.