Gitigbas, gani giputlan pagyud og ulo ang usa ka lalake sa tag-iya human nga gikaingong nasapon nga nangawat og mais adtong Domingo pasado alas 4 sa hapon didto sa Barangay Mindagat, Malitbog, Bukidnon.
Ang biktima usa ka 48 anyos nga lalakeng residente sa nasangpit nga dapit, samtang ang suspek, usa ka 35 anyos nga lalaki, mag-uuma, ug residente sa Sitio Tagbaay, Mindagat, Malitbog, Bukidnon.
Sa inisyal nga imbestigasyon sa kapulisan, nasayran nga naaktohan gayud sa suspek ang biktima nga namupo og mga bunga sa iyang tinanom nga mais.
Tungod sa grabeng kasuko, gilakag matud pa sa suspek ang biktima ug sa dihang naabtan kini sa payag nga iyang gipuy-an, didto na kini niya gitigbas-igo sa iyang likod nga bahin.
Wala pa natagbaw ang maong tag-iya sa mais, ug human sa iyahang gihimong pagpanigbas, giputlan pa niini og ulo ang biktima ug gilabay ngadto sa kasagbotan nga bahin kilid sa dalan.
Human sa maong insidente, bulontaryo usab nga mitahan sa kapulisan ang suspek ug narekober sa crime scene ang sundang nga gigamit sa suspek sa pagpanigbas.
Sa karon, nakakustodiya na sa Malitbog Municipal Police Station ang suspetsado alang sa tokmang disposasyon.