Alas 4:23 sa hapon kaniadtong Hulyo 25, 2018, nakadawat ug taho ang Tampilisan MPS gikan sa usa ka concerned citizen, nga adunay nahitabong pagpangluba sa Barangay Balacbaan, Tampilisan, Zamboanga del Norte.
Ang biktima naila nga si Tirso Tao Buhali, 37 anyos, ug ang suspetsado naila nga usa ka Renante Gonotan Lumangoy, 20 anyos, ug pulos mga residente sa naasoy nga lungsod.
Base sa pagpanginsusi sa mga otoridad, nga mga 4:20 sa hapon sa susamang petsa, samtang ang biktima gabarog sa covered court sa nahisgutang barangay, gidunggab lamang kinig kalit sa suspetsado nga walay daghang yawyaw ug naigo kini sa iyang tiyan.
Ang biktima gilayong gidala sa Ipil Emergency Hospital, Ipil, Zamboanga Sibugay aron kini kapatambalan, samtang ang suspetsado dayong misibat sa wala masayring direksyon.
Nakuha gikan sa nahitaboan sa insidente ang usa ka kutsilyo nga ginamit sa pagpangluba, ug padayon pa gihapon hangtud karon ang pagpahigayon sa Tampilisan MPS ug follow-up operation aron madakpan na ang miikyas nga suspetsado. (Lyza Bautista)