Davao City – Dakpan ang usa ka lalaki dihang kini nasakpan nga misulay pagpalusot ug daghanang shabu pasulod sa Davao City Jail. Giila ang dinakpan kinsa gibalhog na karon sulod sa silda sa Talomo Police Station nga si Richard Caybot, 40 anyos nga taga Barangay Calinan ning siyudad sa Dabaw.
Gibutyag ni Davao City Jail Warden Jail Supt. Peter Bongngat Jr. nga alas dos sa hapon niadtong Martes , Setyembre 7, 2021 miabot ang suspek sa prisohan nga nagbitbit ug sud-an nga Adobong manok nga dunay sagol nga sili’ng kulikot alang sa usa ka piniriso sulod sa Male Dormitory sa Davao City Jail.
Apan namatikdan nga dunay hiniwaan ang mga sili ug sa dihang gisusi, nakita ang mga sachet sa gituhoang shabu. Mukabat sa 35 ka mga pakete ang narekober nga dunay timbang nga 16 gramos nga mikantidad ug 256,000 pesos.
Dugang ni Jail Supt. Bongngat nga hugtanon nilang gipatuman ang makuting pagsusi sa tanang mga mosulod sa Davao City Jail aron nga mababagan ug masanta ang si kinsa mang mosulay sa pagpalusot ug mga kontrabando pasulod sa prisohan pinaagi usab sa tabang sa PNP-EOD unit.
(Source: Bureau of Jail Management and Penology Region XI)