Naligo sa iyang kaugalingong dugo ang usa ka lalake human kini giluba sa iyang live-in partner didto sa Sta. Filomena sakop ning syudad sa may alas 11 ang takna sa kaudtohon niadtong nakalabayng adlaw.
Nagtingkagol na karon sa mabugnaw nga rehas ang suspek nga si Margieliza Mendoza, 30 anyos, dalaga ug lumulupyo sa Purok Green Leaves, Sta. Filomena sakop ning syudad. Ang biktima giila nga si John Rey Gabuya, 37 anyos, olitawo ug lumulupyo usab sa nasangpit nga dapit.
Sumala pa sa inisyal nga imbestigasyon sa kapulisan, alas 10 y medya sa buntag nag-inom ang mag-live in partner sulod sa ilang lawak sa ilang giabangan nga boarding house. Apan wala madugay nagkalalis ang duruha, nagkabansiliay ug mga sakit nga pulong hinungdan nga nagbaga na ang tensyon batok sa duruha ug naglayogay na kini. Pagkataod-taud nigawas ang biktima nga nagdagan pagawas sa ilang kuarto ug gigukod kini sa suspek nga nagdala ug 10.5 inches nga gitas-on sa kutsilyo, adunay plastic handle nga color orange, naabtan sa suspek ang biktima ug dali niya kining giluba-luba sa nagkalain-laing parte sa kalawasan niini nga maoy hinungdan nga naligo kini sa iyang kaugalingong dugo. Nagpakitabang ang biktima hinungdan nga nitawag ug police assistance ang mga nakasaksi niini. Dali kining girespondehan sa atong kapulisan ug nadakpan ang suspek nga anaa na karon gibalhog sa Dipolog City Police Station aron sa pormal nga pagpasaka ug kaso batok kaniya. Si Gabuya dali kining gidala sa Zamboanga del Norte Medical Center ug anaa kini ngadto karon nagpaalim sa iyang samad nilubaan.
