Nadakpan na sa mga kapulisan ang lain pang suspek sa pagpanulis og gasolinahan sa lungsod sa Pangantucan atol sa gihimong Joint Hot Pursuit ug Dragnet Operation pasado alas 7 sa buntag kagahapong adlawa partikular sa Purok-3, Barangay Base Camp, Maramag, Bukidnon.
Ang suspek usa ka 37 anyos nga lalaki, ug residente sa Barangay Bulit, Datu Montawal, Maguindanao Del Sur.
Sigon sa report, nga misakay sa usa ka Cargo Truck nga kargado og tubo ang maong suspek padulong sa sentro sa lungsod sa Maramag ug didto na kini nadakpan pag-abot sa area.
Narekober gikan sa posesyon niini ang usa ka unit sa Armscor caliber .45 pistol, usa ka magazine nga kargado og tulo ka mga buhing bala, ug usa ka pitaka.
Sa karon, gikustodiya na sa hingtungdang ahensiya ang suspek samtang mag-atubang og kasong Robbery, Attempted Murder, ug paglapas sa RA 10591 o ang Comprehensive Used of Firearms and Ammunition Regulation Act may kalambigitan sa COMELEC Gun Ban.
Mahinomdoman, nga ang suspek usa sa duha nga nakaikyas, sa dihang makigpinusilay sa kapulisan human manulis og gasolinahan partikular sa Barangay Adtuyon, Pangantucan adtong Sabado sa buntag.
Patay ang usa sa kauban niini samtang padayong gipangita ang laing nakatakas nga suspek.