Makadawat na usab karon ug ayudang pinansyal ang Zamboanga del Norte Medical Center (ZNMC) gikan sa Department of Health Zamboanga Peninsula –Center for Health Development (DOH ZPCHD) sa kantidad nga P400,000.
Kini human gihatagan ug otoridad sa mga miyembro sa Sangguniang Panlalawigan si Governor Roberto Uy sa ngalan sa kagamhanang probinsyal sa Zamboanga del Norte  sa pagpirma sa Memorandum of Agreement (MOA) tali na sa DOH nga gi-representahan ni Regional Director Emilia Monicimpo.
Si Board Member Ruth Brillantes, sa tersero distrito ug Chairperson sa Committee on Health maoy mipasupot sa resolution sa paghatag ni Governor Uy sa otoridad sa pagpirma sa maong Moa, atul sa ilang regular session karong semanaha.
Ilawum sa maong kasabutan, ang DOH mobalhin sa maong pundo ngadto sa probinsya alang na sa ayuda sa mga kabus nga pasyente subay sa gihubit sa pagpatuman sa 2020 Medical Assistance to Indigent Patients (MAIP) Program sa mga DOH hospitals ug uban pang pinili nga government health facilities.
Ingon man, ang probinsya sa Zamboanga del Norte walay pinansyal nga obligasyon gawas lamang eseguro nga adunay tambal ug uban pang health care services nga gikinahanglan sa mga indigent nga mga pasyente ug kini alang lamang sa Zamboanga del Norte Medical Center.
Sa pikas bahin, gihatagan usab ug otoridad si Governor Uy sa pagpirma sa MOA tali na sa Sibuco Municipal Hospital ug Labuan General Hospital sa dakbayan sa Zamboanga alang na sa Inter-Facility Referral system.
Tuyo niini aron masustiner ug mapalig-on ang koneksiyon sa ubang tambalanan ug uban pang emergency medical services alang sa katawhan. (PIC-mbmontederamos)