Usa ka health summit ang ipahigayon sa Sugbo diin mga propesor gikan sa Fujian University on Traditional Chinese Medicine (TCM) ang mohatag og kahibalo sa mga medical personnel sa Cebu bahin sa tradisyunal nga medisina.
Matod ni Gov. Gwen Garcia sa iyang media briefing niadtong Biyernes, Enero 3, nga ang Capitol ug FU-TCM wala pa magkauyon sa petsa sa maong summit, apan iyang gipadali ang plano aron ma-integrate ang TCM sa Sugbusog backyard gardening initiative ug sa training alang sa barangay health workers sa probinsya.
“Ang mga tanom nga medikal dali ra makuha ug puwede tanomon uban sa Sugbusog Program. Accessible kini labi na para sa mga kabus,” matod ni Garcia.
Ang Sugbusog Program nga nagpalambo sa food security naghatag usab og importansya sa pagpatubo og mga tanom nga medisinal aron masulbad ang mga kasagarang sakit, ilabi na sa mga rural nga lugar. Kini nga programa gimugna atol sa pandemya aron maghatag og mas barato ug accessible nga alternatibo sa healthcare.
Ang partnership tali sa Cebu Province ug FU-TCM gipormal pinaagi sa Memorandum of Understanding niadtong Nobyembre 2024 atol sa pagbisita ni Garcia sa Fujian, China. Lakip sa kasabotan ang pag-integrate sa TCM sa healthcare system sa Cebu ug pag-edukar sa mga health workers bahin sa alternatibong medisina.
Dugang pa, ang Cebu Province nakigkuyog usab sa Philippine Institute of Traditional and Alternative Health Care (PITAHC) aron ma-train ang barangay health workers sa paggamit og alternative medicines nga mas barato ug epektibo.
Kini nga inisyatiba sa gobernador nagtinguha nga i-apil ang tradisyunal nga medisina sa modernong sistema sa healthcare alang sa mas abot-kamay ug maayong serbisyo alang sa katawhan sa probinsya. (Renante Socia Lada)
(Source: Cebu Provincial PIO)