Usa ka trahedya ang nahitabo sa Barangay Gairan, Bogo City alas-2:00 sa kadlawn niadtong Enero 4, 2025, diin usa ka amahan, 39-anyos, ang namatay human nakuryentihan samtang nag-charge sa iyang cellphone. Ang biktima, residente sa maong lugar, gideklarar nga dead-on-arrival sa tambalanan.
Sumala sa imbestigasyon sa Bogo City Police Station, gipangulohan ni Police Chief Master Sergeant Jim Susvilla, ang inahan sa biktima maoy misumbong sa insidente sa kapulisan. Matud niya, ang iyang apo nga 12-anyos nakakita sa iyang amahan nga nahagba sa salog ug wala nay panimoot.
Gibutyag sa bata nga iyang gipukaw ang amahan apan nakamatikod siya nga kini nagkupot sa extension wire ug posibleng nahikap sa exposed nga metal sa phone charger. Nangayo dayon kini og tabang, apan bisan pa sa pagdala sa amahan sa tambalanan, gideklarar kini nga DOA.
Ang post-mortem examination nagpakita nga ang hinungdan sa kamatayon mao ang Cardiovascular Arrest (Electrocution).
Nagpasidaan usab ang kapulisan sa publiko nga mag-amping sa paggamit og electrical devices aron malikayan ang susamang trahedya. (Renante Socia Lada)