Cebu City- Milabay ang laing adlaw nga walay nadugang nga kompirmadong kaso ug namatay sa coronavirus disease kun Covid 19 sa Central Visayas.
Tungod niini, matod pa sa Department of Health kun DOH 7, ang ihap sa kompirmadong mga kaso ug sa mga nakalas nagpabilin sa 35 ug 8.
Ang DOH 7 nakatala usab og dugang duha nga nakarekober o ‘laboratory negative’ human sa uwahing testing sa swab sample.
Ang duha ka pasyente pulos taga dakbayan sa Sugbo – usa ka 45 anyos nga lalaki ug 42 anyos nga babaye.
Kini naghatod sa kinatibuk-ang gidaghanon sa recovery sa region 7 ngadto sa 13.
Apan gitataw ni Direktor Jaime Bernadas sa DOH 7 nga dili tanang nagnegatibo ang gipagawas sa ospital ilabi na sa duha ka pasyente sa Negros Oriental nga pabiling gi-admit alang sa dugang obserbasyon.
Sa nasayran, ang 54 ka samples sa Central Visayas nga gihiling sa  Vicente Sotto Memorial Medical Center, ang sub-national laboratory sa dakbayan sa Sugbo, negatibo ang resulta.
Sa pikas bahin, ang kinatibuk-ang ihap sa kompirmadong kaso sa COVID-19 sa Pilipinas miabot na og 3,660 samtang 163 ang patay ug 77 ang nangaayo.
