Laing mga pork chorizo na usab ang nakumpiska ug gisunog sa composite team sa PVet Sarangani kon Provincial Veterinary Office sa direktiba ni Governor Steve Chiongbian Solon, Malungon Municipal Agriculture Office ug PNP Malungon sa pagdumala ni Mayor Tessa Constantino, PNP Region 12, National Meat Inspection Service Region 12 ug Food and Drug Administration, alayon sa padayong kampanya nga dili masudlan og African Swine Fever ug magpabiling ASF-free ang tibuok Sarangani Province.
Segun ni Dr. Bernard Cababat, ang provincial veterinarian sa probinsya sa Sarangani, human sa linibo ka kilo nga ilang nakumpiska atong bulan sa Mayo, niagi lang Hulyo 14 laing tresentos traynta (330) kilos kon 1,100 ka pack sa pork chorizo napud ang nakumpiska sa ASF Task Force sa Barangay Malungon Gamay checkpoint, boundary sa Davao Region.
Samtang anaa pay outbreak sa ASF sa Region 11, nagpabilin matud pa ang kamanduan nga bawal makasulod sa Sarangani ug sa Rehiyon Dose ang mga produkto sa baboy, buhi man, karne o processed meat bisan may permit pang mapakita ang nagdala.
Ang probinsya sa North Cotabato ang nasudlan na og ASF partikularminte ang munisipyo sa Magpet. Ginatos na ka mga baboy sa Magpet, North Cotabato ang gipang-culling, gipamatay pinaagi sa pagsunog ug paglubong. Gikabalita nga nagsugod lang kini matud pa sa chorizo nga napakaon sa mga baboy pinaagi sa lamaw.
Gawas sa Malungon, mahugtanon usab nga ginabantayan sa PVet Sarangani ang border area sa Glan sa pakig-alayon sa buhatan ni Mayor Vivien Yap ug sa mga barangay kapitanes, tungod usa (1) ka lugar na lang matud pa ang wala masudli og African Swine Fever sa boundary area sa katapad nga probinsya nga Davao Occidental nga una ng nagka-outbreak sa ASF. Ila ng napa-alarma ang mga border barangay sa Glan sama sa Laguimit, Rio del Pilar, San Jose ug Batulaki.
Adunay disinfection form gina-fill up ang mga ga-byahe gikan sa Davao Occidental nga gaagi sa Batulaki, Glan ASF checkpoint aron masiguro nga niagi og pag-spray ang mga ligid sa ilang mga sakyanan.
Nag-abiso si Doctor Cababat kauban si Assistant Provincial Veterinarian Doctor Roy Mejorada nga dili magduha-duha sa pag-kontak sa Provincial Veterinary Office ug sa matag Municipal Agriculture Office. Kung nagduda na matud pa sa nagluya nila nga baboy ug may pantal-pantal na ang lawas, duolon na ang ilang mga opisyal aron paspas ma-report ug maadtuan dayon para makuhaan og sample. Pwedeng ma-kontak ang PVet Sarangani sa celfone number nga 09120640898.
Gani, ilang nasaka ang mga kabukirang lugar sa Alabel partikularminte ang Barangay Datal Anggas ug Pag-asa aron ma-beripika ang mga impormasyon, ug tuod man nag-negatibo matud pa sa test ang ilang nakuha nga mga sample.
Dako na lamang ang pagpasalamat sa labaw sa Sarangani Provincial Veterinary Office ngadto ni Governor Solon tungod sa padayong pag-ayuda kanila, hilabi na sa suplay sa disinfection chemical solution, sa pagsuporta sa mga board member, nila Vice Governor Elmer De Peralta, Senador Manny ug Congressman Ruel Pacquiao, ug tanang mayores. Una ng nagmando si Governor Solon nga dili lang Coronavirus ang bantayan kundili apil usab ang hulga sa ubang mga balatian sa tao lakip na sa mga kahayupan, sama sa dengue, polio, ug kining African Swine Fever.
Kagahapon lang adlawa, gibalita sa Department of Agriculture nga naigo sa Bird Flu-H5N6 ang linibo ka mga manok sa may Luzon, didto sa Pampanga. Una ng naigo sa bird flu niaging mga bulan ang linibong pugo sa Nueva Ecija didto gihapon sa area sa Luzon. (Sarangani PIO)