Cebu City- Nadugangan na pod og 24 ang gidaghanon sa mga kaso sa Covid 19 sa dakbayan sa Sugbo ilabi na sa sityo Zapatera, brgy. Luz kagahapon.
Mao kini labing taas nga ihap sa positibong kaso sa usa lang ka batch o hut-ong sa sample sa Cebu City.
Sumala pa ni Mayor Edgardo Labella, ang 24 bag-ong kaso pulos asymptomatic ug kini nalakip sa mass testing sa brgy.
Tungod sa bag-ong mga kaso, nahimo nang 53 ang mga positibo sa Covid 19 sa sityo Zapatera ug 77 sa tibuok siyudad.
Subay niini, subling gipadayag ni Labella ang kahinungdanon sa social distancing ug pagpuyo sa balay para pagpugong sa pagkatap sa virus.
Giangkon sa mayor nga ingon sa kompiyansa gihapon ang mga tawo sa lugar kay bisag gipahigayon ang mass testing naay uban nga naglakaw-lakaw ug naggawas-gawas.
Kini ang hinungdan nganong gipahugtan niya pagbantay sa mga polis ang lugar aron higpit mapatuman ang social distancing.
Nakasabot siya nga ang sityo daghan og tawo tungod kay nia dinhi magpuyo ang mga informal  settlers o eskwater nga walay klarong pinuy-anan.