Padayon nga nagsanib-pwersa ang Sulong Sarangani flagship program ni Governor Steve Chiongbian Solon ug ang Ronda Probinsya banner program ni Congressman Ruel Pacquiao sa pagbubo og mga kaayuhan sa probinsya sa Sarangani, hilabi na sa hisgutanang imprastraktura taliwala sa pandemya. Dako kining gikalipay sa mga katawhang Sarangan tungod sila ang benipisyaryo sa pagtinabangay ug paghiusa sa mga opisyales katugbang ang ilang mga kugihan nga mayor.
Bisan ang nagpadayon karon nga pagtuyok sa mga kabarangayan hilabi na sa kabukiran pinaagi sa Serbisyo Caravan para sa Sarangan ang giubanan kini sa kanunay sa mga serbisyo gikan sa Sulong Sarangani, Ronda Probinsya ug mga programa sa nasyonal nga ahensya sa gobyerno, kasundaluhan ug sa mga munisipyo. Ang Serbisyo Caravan para sa Sarangan ang kalihukan subay sa Executive Order No. 70 nga gipagawas ni Pangulong Rodrigo Duterte aron ihatud direkta sa mga barangay ang mga programa ug serbisyo sa gobyerno, partikularminte sa mga lugar nga gi-dominahan kaniadto sa walhong grupo.
Hayag na karon ang 1.2 kilometro nga dalan sa Barangay Baluntay, lungsod sa Alabel human gipasiga ni Governor Solon ang proyekto nga pasuga sa ilang barangay nikantidad og P1.9 Milyon ka pesos, sa pagsuporta kana ni Vice Governor Elmer De Peralta sa iyang #DokVice project, tanang board member ug ni Alabel Mayor Nonoy Salarda.
Samtang, na-turnover na bag-uhay lang ni Congressman Pacquiao kuyog ang DPWH Sarangani sa pagdumala ni District Engineer Jonathan Bantug, ngadto nila Mayor Tessa Constantino, Vice Mayor Jun Escalada ug sa mga barangay kapitan sa Malungon ang ilang mga nindot nga barangay hall sa JP Laurel, Kawayan, Upper Mainit ug San Miguel. Apil na ang sementado na nga farm-to-market road sa Barangay Banahaw ug Lower Mainit, Malungon.
Na-turnover napud sa Kongresista ang barangay hall ug gymnasium sa Barangay Kihan kauban sila Malapatan Mayor Jun Sumbo, Vice Mayor Jean Delos Santos ug barangay council. Lakip na ang barangay hall, footbridge, road concreting ug gymnasium alang sa Upper Suyan, Malapatan nga gipondohan sa pagpaningkamot nila Senador Manny ug Congressman Ruel Pacquiao, Sarangani Capitol ug LGU Malapatan.
Hasta ang barangay hall sa Barangay Amsipit sa presensya nila Maasim Mayor Zyrex Pacquiao ug Vice Mayor Tessie Nambatac. Dili madugay i-turnover usab nila Governor Solon ug Vice Governor De Peralta ang tulay ug gymnasium sa maong Barangay Amsipit sa Maasim.
Nagpadayon sa gihapon ang pabalay housing project sa magsuong Senador Manny ug Congressman Ruel. Sa pikas nga bahin, gikumpirma ni Governor Solon nga karong tuiga 2021, nasakmit nila ang dugang pondo nikantidad og P700 Milyones ka pesos aron sa padayong pagpasemento sa mga nag-unang provincial road sa kabukiran sa Sarangani Province.
Sila matud pa sa Kapitolyo sa pagpanguna ni Assistant Provincial Administrator Engr. Gerald Faciol ug Provincial Engineering Office ang naghan-ay ug naghandos sa listahan sa mga dalan nga padayong sementuhon mukabat sa siyam (9) kabuok dagko nga mga provincial road. Samtang si Congressman Ruel ang ni-ayuda nga mapondohan sa nasyonal nga gobyerno og P700 Milyon.
Usa na niana ang bag-uhay lang gi-groundbreaking nga dalan gikan sa Malungon lahos sa katapad nga probinsya ug mag-konekta sa munisipyo sa Sta. Maria, Davao Occidental, pabor na unya sa paspas nga pagdala sa mga produktong agrikultura. (Provincial Information Office – Sarangani)
