General Santos City – Arestado ang 27-anyos nga fish port laborer human namaligya ug nakuha-an og Php30,000 nga kantidad sa gituohang shabu atol sa Anti-Illegal Drug Entrapment Operation sa GenSan PNP sa Purok Manisan, Barangay Tambler, General Santos City, mga alas 12:40 sa kaadlawon.
Si Police Colonel Jomar Alexis A Yap, City Director sa General Santos City Police Office, niila sa nasikop nga suspek nga si alyas “Jayson, ulitawo, residente sa Barangay Calumpang, General Santos City.
Matod ni PCol Yap, gidakop dayon sa mga operatiba sa GenSan-Police Station 5, Regional Special Operations Group 12 ug City Mobile Force ang suspek human gibaligyaan niini ang poseur buyer og usa ka pakete sa gituohang shabu bugti sa Php500 bill nga gigamit sa buy-bust money.
Dungan sa pagkasikop sa suspek, nasakmit usab gikan sa iyang possession ang laing 1 ka dakong pakete sa gituohang shabu nga motimbang og 1.0511 gramos nga mobalor og Php30,000. Sa pagkakaron anaa na sa kustodiya sa mga otoridad ang suspek ug pasakaan kini og kasong kalapasan sa RA 9165 o Comprehensive Dangerous Drug Act of 2002.
Ang malampusong operasyon batok sa ilegal nga drugas usa ka pruweba nga wala gikapoy ang GenSan PNP sa pagsumpo sa illegal nga drugas sa syudad aron mamintinar ang himsog ug malambuong komunidad. (Abantero Rem)