Cebu City – Nagtinguha si Cebu City Mayor Edgardo Labella nga i-waive ang abangan sa mga manindahay sa Carbon Market paglabay sa tulo ka tuig hangtod matukod ang bag-ong merkado.
Mao kini gipadayag ni Labella atol sa groundbreaking ceremony sa ₱ 5.5 bilyon nga public-private partnership o triple P’s project sa siyudad uban sa Megawide Construction Corp. sa miaging adlaw.
Ang groundbreaking sa Carbon Market modernization program nagpasabot og pagsugod na sa trabaho sa merkado aron mahimong first-class commercial hub.
Ug aron paghawan sa katukoran sa modern market, gatosan ka vendors ang gibalhin gikan sa Warwick Barracks ug Freedom Park ngadto sa refurbished Carbon Unit II.
Ang abangan magpabilin segun sa gipasalig sa Megawide sulod sa tulo ka tuig hangtod mabalhin sila sa bag-ong merkado diin 1,500 ka stalls ang ambitan sa kapin sa 3,000 ka vendors.
Apan buot ni Labella nga di nalang paabangon ang mga manindahay paglabay sa tulo ka tuig.
Rama Supak
Sa iyang bahin, supak si Cebu City Vice Mayor Michael Rama sa groundbreaking sa modernization sa Carbon Market.
Atol sa iyang privilege speech, si Rama wala makauyon sa iyang gitawag og “hasty” event.
Si Rama, nga mipatugbaw og mga isyu sa proyekto ilabi na sa cultural impact ug kahimtang sa mga vendors, nakapangutana nganong dili man makapaabot ang Megawide Construction Corp. nga mahapsay ang tanang isyu una mag-ground break.
Suma pa sa bise mayor, wala siya motunga sa event ug walay usa nga gitugtang morepresentar kaniya isip protesta sa proyekto nga sa iyang pagtuo nagkinahanglan pa og dugang negosasyon.
Iyang gihimug-atan sa iyang privilege speech nga trabaho sa konseho ang pagpanalipod sa mga constituents ug ipatugbaw ang balaod ilabina sa mga negosasyon sa init nga isyu nga dili pa mahuman.
Dayag nga concern usab si Rama sa cultural ug historical significance sa Carbon Market nga mahimong mapapas sa ipahigayong modernization.
Gani, ang CHAC o Cultural and Historical Affairs Commission nga gipangulohan ni Rama, mi-request man sa Megawide pagduso og plano sa development sa Carbon aron pagsuta kon dili ba mawa ang historical significance ug kon ang development nahisubay ba sa standards nga gilatid sa National Historical Commission. (Jhon Tadlip/JTY)
(Source: Cebu City Public Information Office | Office of the Vice-Mayor-Cebu City, photo courtesy of Cebu City Public Information Office)
