Cebu City – Giaprobahan sa ikatulo ug kataposang pagbasa sa ubos-balay-balaoranan ang balaodnon nga nagtinguha pag-usab sa ngan sa MCIA o Mactan Cebu International Airport.
Gipahibawo sa Kongreso nga mikabat og 16 ka House Bills ang ilang giaprobahan sa third and final reading kagahapon.
Usa niini ang HB 8986, ang balaodnon nga nagsipong sa tanang proposal sa pag-usab sa ngan sa airport agig yukbo ni Datu Lapu-Lapu.
Sa boto nga 195-0-0 sa membro sa House ilang gi-aprobahan ang maong balaodnon.
Kon mahimo nang balaod, ang Terminal 1 sa MCIA tawgon na og Lapu-Lapu Domestic Terminal ug ang Terminal 2, Lapu-Lapu International Airport.
Ang HB 8986 naggikan sa balaodnon nga giduso ni anhing Kong. Raul del Mar sa amihanang distrito sa Cebu City, Kong. Paz Radaza sa Lapu-Lapu, ug Kong. Eric Olivarez sa unang distrito sa Parañaque.
Sa nasayran, gitakdang magsaulog ang Pilipinas sa ika-500 nga anibersaryo sa Kadaogan sa Mactan karong Abril 27. (Jhon Tadlip/JTY)
(Source: House of Representatives-Eighteenth Congress, photo courtesy of Mactan-Cebu International Airport Authority)