Subay sa programang Mass Drug Administration o Sabayang Gamutan sa Department of Health, aduna na usay libreng pagpamurga niining bulan sa Enero alang sa mga magtutungha gikan Kindergarten hangtud Grade 6.
Samtang sa mga bata nga nag-edad 1-4 anyos ug sa mga dagko nga nagpangidaron 16-65 anyos mamahimong mauadto lamang sa haduol nga health center alang sa maong katuyuan.
Gipaklaro sa maong buhatan nga ang mga tambal alang sa pagpamurga luwas ug rekomendado kini sa World Health Organization (WHO).
Gipahinumduman sa DOH nga kinahanglan busgog ang mga bata sa dili pa kini paimnun sa maong tambal aron malikayan ang pagpanakit sa tiyan.
Lakip sa masinati human sa mahatagan sa pagpamurga mao ang pagpanakit sa tiyan ug ulo, pagsuka, pagkalipong ug pagkalibanga diin dili angay kabalak-an.
Apan kining maong mga sintomas masinati sa mga bata kung adunay bitok sa tiyan diin maoy epekto sa maong tambal.
Hinuon, ang DOH nagpahimangno nga kini obserbahan sulod sa 24 oras, kung padayong mabati ang maong mga sintomas, magpakonsulta gilayon sa haduol nga health center o hospital aron matambalan.
Nasayran nga tahas sa maong ahensya sa maayong panglawas nga mapakunhod ang kaso sa mga bata nga apektado sa bitok nga maoy hinungdan sa pagkaluya, mawala ang gana sa kaon, ubos ang IQ ug ang pagpangluspad.
Ang Kontra Bulate Program ipahigayon kini bulan sa Enero ug Hulyo matag tuig.