Iriga City – Pinahimutikan ni City Councilor Wilfranco “Boboy” Guevarra an akusasyon nin panlalastar asin paghoma ki SK Chairman Kenneth Nunez kan San Francisco Cuidad na ini.
Ini an binutasan na pahayag kan konsejal kasabay kan pagsabi na dai niya nungka ginibo an sinambit ng akusasyon kun sain an mapatunay soboot iyo an CCTV sa may Brgy. Hall kan San Francisco.
Sigun sa saiya, dai niya pueding maginibo an siring na akusasyon huli ta igua siya nin respeto sa mga namamanwaan kan cuidad maski pa siisay, kalaban man ini O bako sa politika.
Inot kaini, nagin viral sa social media an akusasyon kan SK Chairman na soboot binantaan siya na kakastahan kan konsejal, matapos na magka-hilingan sa parte kan Brgy Hall sa pag-agi kan konsejal kan nagtalikod na aldaw.
Mientras tanto, sinabi man ni PB Mark James Temenia na nagka-olay na sinda kan saiyang SK Chairman asin sinabi kaini na tutuo an ginibong ining pananakot ni Guevarra asin testigo pa soboot kan SK Chairman an duwang brgy. kagawad.
Sinabi pa ni Temenia, na tuod soboot sa pambubully an konsejal na minsan dai na sana ninda pinapatulan.
Alagad sa pangyayaring ini, tinaw’an nin duon ni Temenia na maatubang sinda nin pormal na reklamo kontra ki Guevarra, mientras na sa lado kan city councilor sinabi kaini nan aka-andam man siya na atubangon an ano man na akusasyon kontra sa saiya tanganing mapatunayan kun siisay an nagsasabi nin tutuo. (Melvin F. Barayoga, RPN DZKI Iriga OIC)
(Source: Interview with City Councilors Guevara and Temenia)
