Hugot nga gipasalamatan sa konseho sa syudad ubos ni bise mayor Kikang Uy ang City Veterinary Office ubos ni Dr. Lucien Anthony Acac sa ilang padayon nga pag-atiman ug pagmonitor sa sector sa mga hog raisers dinhi sa syudad batok sa ASF.
Kini human si Dr. Acac personal nga mi-update sa konseho sa kahimtang sa mga binuhing baboy ug mga gipatumang lakang aron nga dili mo-grabe ang kaso sa African Swine Fever (ASF) dinhi sa syudad.
Si Acac mibutyag nga gihatagan og mando ang mga kapitan nga wala lang usay movement sa mga binuhing baboy diha sa ilang tagsa tagsa ka barangay ilabina gayud sa mga barangay nga aduna nay kaso sa ASFÂ Â sa pagsiguro nga dili kini makapanakod sa kasikbit nga mga dapit.
Gani, gidili sa pagkakaron ang pagbalhin o pagdala sa karneng baboy ngadto sa laing dapit.
Hinoon, gipahibalo sa city vet nga padayon ang pagpahigayon sa surveillance activity pinaagi sa pagkolekta og samples aron pagseguro sa tukmang kahimtang sa mga binuhing baboy.
Dili mahimo nga pasagdan nato ang mga hog raisers kay ang pagbuhi og baboy maoy ilang kapanginabuhian, pamahayag ni bise mayor Kikang Uy.
Niini, siya nagdasig sa buhatan sa pagpadayon pagpatuman sa mga lakang aron masumpo ang pagkaylap sa ASF dinhi  sa syudad ug matabangan ang mga hog raisers. (Sangguniang Panlungsod – CdeO)