General Santos City – Nakasinati og kakulangon sa ihap sa body-worn camera ang kapulisan sa GenSan nga nakaapekto sa pagpasaka og kaso sa piskalya. Matud ni Police Col. Nicomedes Olaivar Jr., director sa General Santos City Police Office (GSCPO) nga sa karon naa lang sa 15 ka unit ang naa sila. Kini ang gipang-apud apud sa napulo ka presinto ug sa mga unit sulod sa city headquarters.
Giangkon ni Olaivar nga dili paigo ang matag usa ka unit sa BWC tungod ang ideal upat ka unit sa matag presinto ug unit ilawom sa GSCPO. Mihangyo na usab sila sa regional headquarters aron madungagan ang ihap sa ilang body-worn cameras.
Dugang sa opisyal nga dunay mga kaso labi na anti-illegal drugs ang nabasura sa piskalya tungod sa teknikalidad sama sa BWC.
Sa bahin ni Police Major Robert Fores, hepe sa Police Station 9 tungod bag-o pa lang sila daghan og kulang nga ekepe sama sa BWC. Apan wala silay kaso nga giduso sa piskal nga nabasura gumikan sa kawad-on sa maong device. Una nang, gimando sa Supreme Court ngadto sa law enforcers ang pagsuot sa maong device atol sa pagpangadakop.