Cebu City- Nakalitan ang kagamhanang probinsiyal sa Sugbo sa pagka demanding sa bag-ong hut-ong sa mga pasahero nga nangabot sa Sugbo gikan sa Taiwan.
Una niini, nasorpresa usab ang Kapitolyo sa kalit nga pagsaka sa gidaghanon sa mga tawo nga gipaubos sa quarantine tungod sa hulga sa Coronavirus Disease-19 kon COVID-19.
Sukad niadtong Lunes sa gabii, giapil na ang Taiwan sa travel ban nga gipatuman sa gobyerno sa tinguha nga kapugngan ang pagkatap sa Covid-19 sa nasod.
Matod pa ni Garcia, nakalitan gyod siya sa pag-apil sa Taiwan sa travel ban kay ang mga tawo nga gikan didto labihang sabaana.
Sumala pa ni Garcia, ang mga Sugboanon nga nangabot gikan sa Hong Kong sa miaging semana ubos na karon sa kwarantina.
Midugang ang gobernador nga kadtong unang gi-quarantine sa Women’s Center nga gikan sa China wala may libog ug buotan kaayo sukwahi sa nangabot gikan sa Taiwan nga labihan ka-demanding.
Ang 14-ka-adlaw nga kuwarantina, nga gipatuman sa kagamhanang probinsiyal sa mga Pinoy ug sa permanent Philippine residents nga gikan sa China, Macau, Hong Kong ug Taiwan o kadtong nakabiyahe sa nahisgotang mga lugar sa milabayng 14 ka adlaw, nahasubay sa guidelines sa travel ban.
Gani, matod ni Garcia, adunay ubang gikan sa Taliwan nga mihulga pagkeha sa pangu sa Provincial Health Office, Dr. Cristina Giango, sa pag-hold kanila sa pasilidad sa probinsiya nga nahimutang sa boundary sa brgy. Busay ug Apas, Cebu City