Cebu City – Nagpabilin pa sa evacuation center ang uban sa 148 ka pamilya o 365 ka tawo nga apektado sa storm surge sa Brgy. Ibo, dakbayan sa Lapu-Lapu sa miaging adlaw.
Sa nasayran, napugos pagpamiya sa ilang gipuy-an ang mga mulupyo Sitio Apro, Tacan ug Seaside dihang gihampak sa dagkong bawod ang ilang gipuy-an.
Temporaryo silang gipapasilong sa duol nga tunghaan sa Ibo ug gitunolan og hinabang sa taga CSWDO.
Si Nagiel Bañacia, pangu sa CDRRMO, miingon nga sagad sa mga balay nga gipayhag sa dagkong bawod gama lang sa light materials.
Matod pa niya, tungod sa kapeligro sa storm surge sa dapit nga gipuy-an sa mga biktima, di na mosugot ang kagamhanang local nga magtukod pa sila og balik sa ilang balay sa maong luna.
Gipasalig sa CDRRMO nga ibalhin sila sa mas luwas nga dapit ug hatagan og construction materials.
Gawas sa Ibo, nakadawat og report si Bañacia nga gilampurnas usab sa dagkong bawod ang kabaybayonan sa isla sa Olango diin duha ka bay ang naguba sa Brgy. Caw-oy ug lima sa Talima.
Ang ubang mga pamilya nga nagpuyo sa apektadong barangay gipahiklin pod.
64 ka pambot sa mga mananagat sa duha ka barangay ang giguba usab sa dagkong bawod.
Hinuon, walay usa nga namatay sa maong mga insidente.
(Jhon Tadlip/JTY, photo courtesy by CSWDO Annabeth Cuizon)
(Source: CDRRMO-Lapu-Lapu City)