CAGAYAN DE ORO CITY- Kapin sa 200 ka mga STL ug lotto outlets ang napatak-upan na dinhi sa Amihanang Mindanao sunod sa mando ni Presidente Rodrigo Duterte. Kalagmitan niini nga mga outlets naa sa dakbayan sa Iligan, sumala pa ni Police Regional Office 10 Spokesperson Police Lt. Col Mardi Hortillosa. Gani matud pa ni Hortillosa, nga posibleng madugangan pa ang maong gidaghanon.
Dugtong sa mando sa presidente nga sirad-an ang tanang gaming operation sa Philippine Charity Sweepstakes Office o PCSO sud sa 24 oras, gimanduan usa sa PRO-10 Regional Director Brigadier General Rafael Santiago Jr ang tanang hepe sa Northern Mindanao nga tumanon ang order sa president sa nasud.
Gituhuan nga madugangan pa ang gidaghanon sa unang napasirhan nga STL ug lotto outlets tungod kay wa pa nakaabot ang report sa ihap gikan sa mga probinsya sa Bukidnon, Misamis Oriental ug Misamis Occidental, dugang pa ni Hortillosa.