Wala pay natumbok ug padayon pa ang imbestigasyon sa kapulisan kung kinsay mikuha sa kwarta kantidad P120,000 nga gisulod sa wallet ug gipahiluna sulod sa shoulder bag sa complainant nga si Catherine Alinsunod, 37 anyos, dunay live-in partner, barangay treasurer sa barangay Malinao, Tubajon, probinsiya sa Dinagat Islands.
Sumala sa gisugid ni treasurer Alinsunod nga buntag sa Disyembre 13, samtang siya nagsakay ug tricycle gikan sa Brgy. San Juan, iyang nadiskubre nga nawagtang na ang iyang wallet nga maoy iyang gisudlan sa kwarta. Dugang pa sa complainant nga sa may 7:30 an takna sa kagabhion niadtong Disyembre 12 ning kasamtangang tuig, sulod sa panimalay nila Mr. Alfredo ug Mrs. Percila Serna sa P-3, Sitio Alingid, Brgy. San Juan nga maoy ilang gisak-an niadtong gabhi-ona, siya ug si Mrs. Arnie Amaro, 29 anyos, minyo, Brgy. Kagawad sa Brgy. Malinao, Tubajon ang nag-tinabangay sa pag-ihap sa kwarta sa ilang barangay.
Human sa ilang pag-ihap, iyang gibutang ang mao nga kwarta sa blue nga wallet ug gisulod ang wallet sa iyang shoulder bag adesir sila nangatulog. Ug kagahapon, Disyembre 13 sa may alas 9:30 sa buntag samtang nagsakay ug tricycle gikan sa San Juan paingon sa city proper iyang nadiskubre nga nawagtang na ang iyang wallet nga diin didto ang kwarta.
Iyang gipahibalo ang tag-iya sa balay nga si Mrs. Serna sa mao nga insidente ug mibalik ang complainant sa Brgy. San Juan. Sa iyang gihimong pagsusi sumala pa nga wala na gayod niya makit-e ang kwarta sa iyang mga butang. Gisuwayan nan complainant an pag-ukad ang mga butang ni Kag. Amaro ug sumala pa didto sa bag ni Kag. Amaro nakaplagan ang iyang wallet nga wala nay kwarta. Ilang gipahibalo sa mao nga panghitabo ug dali nga mi-uli sa balay ug ilang gitabangan pag-pangita ang kwarta apan wala na nila kini makaplage.
Dugang pa gayod sa complainant nga atol sa ilang pag-ihap sa kwarta, silang lima ang didto sa mao nga balay nga mao ang complainant, si Kag. Amaro, Mr. and Mrs. Alfredo ug Percila Serna ang tag-iya sa balay sa Brgy. San Juan ug si Diana Serna nga diha usab nagpuyo sa mao nga balay. Apan walay natumbok ang complainant kung kinsa gayud ang mikuha sa kwarta.
Padayon pa usab ang imbestigasyon sa PNP dugtong na sa nahisgutang nga nawagtang nga salapi.
Samtang sa kabahin ni Arnie Amaro, ang kagawad sa Brgy. Malinao, Tubajon probinsiya sa Dinagat nga nagpatala usab sa City PNP station, nagbutyag nga sa may alas 10:20 an takna sa buntag kagahapong adlawa diha sa sulod sa usa ka grocery store ning atong syudad, siya gitawagan ug gipahibalo ni treasurer Alinsunod mahitungod sa nawagtang nga kwarta ug didto niadtong tungora sumala pa nga iyang nadiskubre nga nawagtang usab ang iyang kwarta sa wallet kantidad P10,000.
Dali siya mipauli sa pinuy-anan nila Mr. and Mrs. Alfredo Serna sa Brgy. San Juan ug didto iyang nakita nga abli na ang iyang shoulder bag ug nahakwad na ang iyang mga butang sa kilid sa bag. Ug iya usab nadiskubre nga apil nga nawagtang ang iyang cellphone.
Apan sa gihapon, wala pay ilang natumbok nga suspetsado nga mikuha sa ilang kwarta.
