KANHI TRABAHANTE SA CIVIL SECURITY UNIT SA SYUDAD SANAN PHILTRANCO CANVASSER DAKPAN SA KAPULISAN NGA NAG-ANGKASAN SA MOTOR
Tungod sa paglapas sa EO 36 kon ginadili ang pag-angkas sa motor gi-aresto sa mga tinugyanan sa kapulisan ang duha ka mga layaki kagahapong adlawa sa may Paradise st. Brgy. Taft, Surigao City sa alas 9:30 ang takna sa buntag.
Nakilay-an ang mga suspetsado nga sila ni Reynaldo Senoc Gamutan, 45 anyos, menyo, isa ka kanhi CSU sa Bus and Jeepney Terminal, residente sa Sitio Looc, Brgy. Luna, Surigao City sanan Carlito Cabagtao Tandog, 56 anyos, ulitiwao, PHILTRANCO Canvasser, residente sa Purok-18 Rivcor, Brgy. Luna, Surigao City.
Sa imbestigasyon ni PSMS Cesar Johans Castillo nasayran nga samtang nag roving patrol sila ni PSSg Jeppy Baguanga sanan PSSg Rene Bagtaso ilang nakit-an ang duha ka mga suspetsado nga nag sakay sa isa ka motorsiklo. Ila ini tagpahunong sanan gisultihan nga moadto sa Provincial Grandstand tungod kay jaoy ilang paglapas sa EO 36.
Apan waya ini namati rason nga ila gipasakay sa patrol. Apan nasuko ang isa sa mga suspetsado na si Gamutan ug nisulti pa nga “tawo ako ni mayor.”
Sa pagkakuman ang mga suspetsado ang jaon sa kustodiya sa Surigao City Police Station. Kuman nga adlaw pormal isang-at ngadto sa City Prosecutor’s Office ang kasong paglapas sa Art. 151 Disobedience To an Agent of Person in Authority in relation with the Implementation of EO-36 (An Order for the Strict Prohibition of Single Motorcycles with Backriders) sanan RA 11332. (Mark James Cortes Lisondra, Ronda 21 RPN DXKS)