Cagayan de Oro City – Palapdan pa sa City Hall ang kampanya batok sa makasupak sa ordinansa nga nagmando pag-sul-ob sa face mask ug social distancing ngadto na sa kabaranggayan sa tibuok syudad. Atol sa usa ka press briefing, gisugilon ni Oliver Egypto, ang hepe sa Office of the Community Affairs, kinsa maoy chairman usab sa #Disiplina Muna Advocacy Team nga kapakyasan imbes kalampusan sa syudad kon daghan gihapon ang madakpan sa pagsupak sa ordinansa tungod kay nagpasabot kini nga daghan pa ang wala madisiplina ug maedukar sa pagsunod sa health safety protocols.
Sa kabahin ni Antonio Resma Jr., ang vice chairman sa #Disiplina Muna Advocacy Team nga sobra 100 ka mga malapason ang nasikop sa merkado sa Cogon human gilusad ang kampanya niadtong Oktubre 5.
Sa pagkakaron, matud niya, nakigtambayayong ang team sa kapolisan aron mapatuman ang kampanya diha sa kabaranggayan kinsa maoy tahasan sa pagpanguna sa operasyon sanglit sila man ang pamilyar sa ilang tagsa-tagsa ka dapit.
Gipasabot nga dili ang pagpangdakop ang nag-unang katuyuan sa maong kampanya kon dili subay sa tinguha nga mas daghan pa ang maedukar sa maong katuyuan.
Gitaho usab ni Lt. Col Yammy Yam-oc, deputy director for operation sa Cagayan de Oro Police Office (COCPO) nga moabot na sa 772 ka mga tawo ang naisyuhan sa ordinance violation receipts o OVRs tungod sa wa pagsul-ob sa face mask, samtang 63 usab ang nasikop tungod sa paglapas sa Physical distancing. (City Information Office)