Cugman, Cagayan de Oro City – USA ka awareness campaign batok sa sakit nga dengue ang gipahigayon sa Barangay Cugman adlaw’ng Miyerkules Agusto 9, pinaagi sa City Health Office ug City Local Environment and Natural Resources (CLENRO) ug konseho sa barangay.
Gipasabot ni City Epidemiologist Dr. Teodulfo Joselito Retuya Jr. ang kamahinungdanon sa pagsunod sa 5’S kon Search and Destroy, Self Protect, Seek Consultation, Support Fogging in outbreak areas, ug Sustain Hydration.
Lakip sa gihatagan og gimbug-aton sa kampanya ang kanunay’ng pagpanghinlo sa palibot aron mapukan ang itloganan sa mga lamok nga nagdala sa sakit nga dengue.
Gibutyag ni Dr. Claire Paglinawan sa Cugman Health Center nga tumong sa maong programa nga mas mapalapdan pa ang kahibalo sa mga katawhan kun unsaon pagpakgang ang sakit nga dengue, ug malikayan ang pagtaas sa kaso niini sa maong barangay.
Atol sa maong awareness campaign, nagpahigayon og recorida tuyok sa barangay aron masayran ang katawhan ang peligro sa dengue virus, dungan ang pag-aghat sa tanan nga manghinlo sa mga butang nga posibleng itlogan sa lamok.
Written by Cheleste Simene
Photo by Cheleste Simene