Dako ang panghinaut ni konsehal Romeo Calizo nga masolosyonan sa daling panahon ang mulo sa mga motorela drivers kalabot sa hingpit nga pagpatuman sa motorela zoning ordinance.
Sa milabayng tigom sa komite, ang konsehal mibutyag nga adunay ipahigayong makuting pagtuon sa gipatumang balaod aron masukip ang hangyo sa mga driver nga mapalapdan ang ilang ruta.
Kinahanglan nga mapanday ang balaod nga matubag ang mulo sa mga driver nga dili usab masakripisyo ang interest ug kaayuhan sa kinabag-an, sumpay ni Calizo.
Mahinumduman nga sa maong tigom, ang kadagkoan sa Roads and Traffic Administration (RTA) mipasabot nga sa pagpatuman sa balaod gikonsiderar usab ang mga driver sa PUJs nga naapektohan ang kinitaan sa operasyon sa motorela dinha sa mga dalan nga maagian sa ilang ruta.
Kini gawas pa sa kapiot sa dagan sa trapiko dinha sa sentrong bahin sa syudad tungod sa kadaghan sa motorela nga magbyahian.
Gani, gipasabot nga active transport ang gitinguha sa balaod ug dili door to door, maong adunay mga ruta nga gikinahanglang magbaklay na ang sumasakay aron makaabot sa destinasyon.
Niini, si Calizo mipasalig nga sa umaabot nga panahon, mapanday ang balaod nga makatubag sa mulo dili lang sa mga driver sa motorela kun dili sa tibouk katawhan sa dakbayan sa Cagayan de Oro. (Sangguniang Panlungsod – CdeO)