Kagamhanang Lokal Sa Dipolog Mipasidaan Sa Mga Katawhan Batok Baha Ug Landslide

0
219

Hugtanon karong mipasidaan ang kagamhanang lokal ning dakbayan pinaagi sa City Disaster Risk Reduction and Management Office (CDRRMO) ngadto sa tanang mga katawhan nga magma-binantayon, ilabi na kadtong nagpuyo daplin sa mga dagat, suba ug kasapaan, lakip usab kadtong nagpuyo haduol sa mga kabuntoran,  batok na sa posibleng kalit nga mga pagbaha (flash floods) ug sa pagdahili sa yuta (landslide) nunot sa presensiya karon ni Bagyong “JOLINA”, nga nagdala ug mga pag-ulan dinhi sa pipila ka mga dapit sa nasud.

Kining maong pagpahimangno ang gihimo karon sa atong dakbayan aron sa makausa pa, mapahinumdoman ang atong mga kaigsoonan nga magahin sa dobleng pag-amping, aron malikayan ang dili damhong disgrasya.

Sumala pa sa advisory gikan sa National Disaster Risk Reduction Management Council (NDRRMC) kagabii, sa may kapin kon kulang alas 6:00 ang takna, kini ang nagpahibalo ang ang mga lalawigan Zamboanga Del Norte ug Zamboanga Sibugay ang gipahimutang ilawom sa “Orange Warning”, nga nagpasabot nga kini ang makasinati sa makusog nga pag-ulan nga modulot sa mga posibleng pagbaha ug landslides.

Subay ning maong pahibalo gikan sa NDRRMC, hugtanon karong nangandam ang CDRRMO dinhi sa dakbayan subay sa mando ni City Mayor Darel Dexter T. Uy, aron sa paghimo sa hinanali nga pag-responde sa bisan unsang panahon kon gikinahanglan.

Apan bisan pa man niini, gikinahanglan usab ang dako nga suporta gikan sa mga katawhan, pinaagi sa pagmabinantayon sa tanang panahon, ilabina karon nga adunay bagyo, pinaagi sa kanunay nga pagbantay adlaw man o gabii, sa lihok sa tubig dinha sa mga  suba ug sapa.

Lakip sa gilantaw nga namiligro kadtong nagpuyo duol sa mga bangilid ug kabuntoran batok sa landslide, gumikan sa paghumok sa yuta tungod sa sige nga nga pag-ulan.

Nunot usab ning maong kalamboan, nagpabilin karong alerto 24/7 ang mga personahe sa CDRRMO dinhi sa dakbayan aron paghimo sa mga gikinahanglang pag-responde sa bisan unsang panahon.

(Source: DIPOLOG CITY GOVERNMENT Facebook page)

LEAVE A REPLY

Please enter your comment!
Please enter your name here