Nahimong makahuluganon ang kasaulogan sa kapistahan sa Birhen sa Santo Rosaryo dinhi sa dakbayan human midalit ang kagamhanang lokal sa Dipolog og “Pamistang Handog” ngadto sa mokabat dos mil ka indibidwal pinaagi sa mga foodpacks, kaganihang buntag, sa may kapin kon kulang alas 11:00 ang takna, Oktubre 7, 2023, didto sa Museo Dipolog, ning siyudad.
Ang maong kalihokan maoy inisyatibo ni City Mayor Darel Dexter T. Uy ug sa mga opisyales ning siyudad, sa katuyu-an nga mahatagan sa pagkaon ang atong mga kaigsoonan, ilabi na gayud kadtong walay padulngan, apan mibisita dinhi sa atong dakbayan aron mosimba.
Makita sa panagway sa atong mga kaigsoonan ang kahimuot nga midawat sa diyotay nga grasya ning panahon sa pista.
Sigun sa nasayran, nga kining maong kalihokan maoy ika-upat na ka higayon nga gihimo sa kagamhanang lokal ning siyudad ilawom sa liderato ni City Mayor Darel Dexter T. Uy, isip pagpa-ambit sa grasya ngadto sa atong mga kaigsoonan panahon sa kapistahan dinhi sa atong siyudad, aron sa pagpabati kanila sa tinud-anay nga kahulugan ug espirito sa pista.
(Source: Dipolog City Government Facebook page)