KAGAMHANANG LOKAL NAN PROBINSIA SANAN CIUDAD SURIGAO NAGMEETING PAGTRATAR SA KASAMTANGAN SITWASYON PAGHAMOK NAN NAGPOSITIBO SA COVID-19
Isa ka meeting an taghimo jadtong Hunyo 25, 2020 tali na sa mga kagamhanang lokal nan probinsia sanan ciudad para na sa pagtratar sa inin kasamtangang sitwasyon nan paghamok sa kumpirmado na positibo sa covid-19.
Taglaong pa ni Atty. Jerry Centro, an City Administrator, isa sa mga noatendir sa meeting sa habig nan ciudad iban kan City Mayor Ernesto U. Matugas, Jr., Atty Manuelito Delani, CDRRM Officer Threlcie Villaces, Asst City Health Officer Dr. Charito Arriba sanan City Tourism Officer Roselyn Merlin na nalakip paghisgut an sitwasyon kuman dinhi sa ciudad na jaoy natipon na mga taga Dinagat Province na waya nagpakatabok sa ila lugar tungod sa padajon na waya pagtugot nan kagamhanang lokal didto na probinsia na may modunggo sa ila mga pantalan na magdaya nan pasahero.
Dugang pa ni Atty. Centro na nagkabiro na an ciudad sa sitwasyon labi na kay limitado na man an resources nan kagamhanang lokal na kinahanglan mohatag nan atension sa ini na mga individual gawas pa sa hulga sa posible na infection sa tagkahadlukan na covid-19.
(Jhino Parrucho, Ronda 10 RPN DXKS)