Cebu City- Wala na usab mogamit og air conditioning unit ang kagamhanan sa dakbayan sa Carcar aron paglikay sa pagkatap sa 2019 novel coronavirus kun 2019 nCoV sama sa gibuhat sa kagamhanang panlalawigan.
Sa post sa ilang official Facebook page, gipahibawo sa gobyerno sa Carcar nga ang tibuok city hall wala na mag-erkon sa tibuok adlaw sugod sa milabayng semana.
Apan kon paandaron man ang erkon kinahanglang dili molapas sa duha ka oras matag adlaw.
Ipatuman sa Carcar ang naasoyng polisiya samtang anaa pa ang hulga sa 2019b nCoV.
Kon mahinumdoman, sa miting uban kang Gob. Gwen Garcia niadtong Huwebes, gisultihan ang mga mayor nga ang usa sa measure o paaagi nga gihimo sa Kapitolyo mao ang pagpawong sa erkon ug pagpangabli sa bentana aron makasud ang lab-as nga hangin.
Gitugotan lang ang mga opisina paggamit og erkon sud sa upat ka oras depende kon unsang orasa nga mainitan pag-ayo sa Adlaw ang buhatan.
Gipasabot ni Garcia sa mga mayor nga ang 2019-nCoV dili molahutay sa init nga temperatura o kadtong lapas na sa 50 ka degrees Fahrenheit busa ang pagpawong sa erkon ang labing maayong buhaton aron paglikay sa virus.
Gawas niana, makadaginot usab ang probinsiya sa balayranan sa koryente nga karon adunay average nga P1.7 milyon matag buwan.