General Santos City – Kampante si Jail Superintendent Riuven Olivo, Jail Warden sa General Santos City Jail male dormitory nga walay mga piniriso na ang nagagamit ug illegal nga droga sulod sa ilahang pasilidad.
Saysay niini nga gikan sa kapin 1,300 nga mqa person deprived of liberty kon PDL, walay ni bisan usa ang nagpositibo sa gihimong random drug test.
Apan, gi-angkon niini nga ang mga bag-ong sulod nga mga piniriso ang wala pa nila subling gipa-ilalom sa drug test hilabina ang mga adunay kasong illegal nga droga gumikan siguradong sila magpositibo.
Dugang pamahayag ni Jail Superintendent Olivo nga wala usab silay natala nga mga kaso nga adunay misuway ug palusot sa illegal nga droga pasulod sa pasilidad sa General Santos City Jail.
Saysay niini nga hugot ang ilahang ginahimo nga pagbantay sa palibot sa jail facility bisan matud pa sa mga pagkaon nga ginahatud, wala silay nakita nga unsa mang illegal nga kontrabando.
Pagpaklaro niini nga kung adunay maayong programa sulod sa jail facility, dili na matud pa makahuna-huna ang mga piniriso sa paghimo ug dautan sama sa pagpalusot ug illegal nga droga. (Alfredo Madas Jr.)