Naotob an pigmawot kan gobyerno lokal kan syudad nin Naga na magin ligtas asin syerto an seguridad kan lambang saro, orog na an mga yaon sa barangay.
Sinabi ni Mayor Leni Robredo na sobra sa sarong semana bago pa magtama an Super Typhoon Uwan sa Naga dakol nang piggigibong koordinasyon asin pag-andam an lokal na gobyerno tanganing magin ready.
Sa saiyang paglibot kan Sabado nin banggi (petsa 9 nin Nobyembre), sinabi kaini na igwa pang mga dapat na helingon an syudad tanganing masyerto talaga an pagiging salbado kan mga evacuees. Pigtaong halimbawa kan alkalde an evacuation center sa Barangay Sta. Cruz na kaipuhan masolosyonan an dakol na mga siwang sa itaas na parte kan edipisyo.
Sinabi kaini na kaipuhan mapakarhay an nasambit nang edipisyo tanganing magserbi bilang sarong totoong evacuation center.
Naheling pa man kan alkalde an kamugtakan sa Naga City People’s Hall sa City hall na nagkabarasa an mga evacuees dara kan makusog na doros asin uran, kun kaya pigpabukasan kan alkalde an mga opisina duman kabali na an mayor’s office para sa mga evacuees.
Sinabi kan alkalde na kaipuhan an retrofitting kan duwang evacuation centers para magin marhay na estaran kan mga residenteng kaipuhan idakit kun igwa nin bagyo.
An syudad nin Naga nagkaigwa nin labi sa 7,000 na evacuees durante kan Super Typhoon Uwan. | via Jason B. Neola
Source: Naga City Government