An Philippine National Police (PNP) sa Bicol nagdeclara nin ‘‘high alert’’ sa ika-54 anibersaryo kan Communist Party of the Philippines (CPP/NPA) bilang pag-andam sa ano man na posibleng pang-aataki nin kariribokan kan mga rebelde NPA sa saindang anibersaryo sa Deciembre 26, 2022.
Dawa na ngani pigsisikwal na soboot kan militar asin PNP an saindang kakayahan alagad sinabi ni BGen. Rudolph Dimas, jefe kan Kampo Simeon Ola kaipuhan maging alerto an mga kapupulisan sa rehiyon nganing maseguro na mamantenir an paz y orden sa rehiyon sa panahon kan Pasko maging sa pagsabat kan Bagong taon.
Enot nang sinabi ni BGen Danilo Benavides, Commander, 502ng Infantry Brigade, 51ID na tama na soboot an ika-52 na aniversaryo kan CPP/NPA huli ta bakong karahayan sa komunidad an saindang dinadara sa Filipino. ‘‘The CPP/NPA has nothing to celebrate. Their deceptions and lies have put many in misfortune. The end is very near not only for the NPA, but for the triad of communist-terrorist CPP-NPA-NDF.’’
Alagad an NDF Bicol nagpaluwas man na perang taon nang pinapahayag ini kan militar na matatapos na soboot an rebeldeng NPA alagad ini propaganda sana mala ngani magkakaigwa sinda nin mga suhay na anibersaryo.
Mientras tanto, sa pagsabat kan Pasko asin Bagong Taon naka-alerto pa an PNP nganing maseguro na magiging matutuninong asin mag-urogma sa selebrasyon an mga Bicolano. (JV Navarro Verdeflor Jr.)
(Source: Bicol News)