Bunsod sa pagtaas ng alert level status ng Bulkang Mayon at ng nakaambang panganib na maaaring idulot ng posibleng pagputok nito, naglabas ng mahigpit na direktiba si PBGEN EROSITO N. MIRANDA, Acting Regional Director (ARD), sa Albay Police Provincial Office (APPO) sa pamumuno ni PCOL Noel Nuñez, na tiyaking ganap at walang pag-aatubiling maipapatupad ang pagbabawal sa presensya ng mga mamamayan sa loob ng 6-kilometer Permanent Danger Zone (PDZ) ng bulkan.
Ang kautusang ito ay alinsunod sa opisyal na abiso ng Albay Public Safety and Emergency Management Office (APSEMO), na mariing nagbabawal sa pag-akyat, pagpasok, at pananatili ng sinuman—kabilang ang mga residente, turista, mountaineers, tour guides, at iba pang indibidwal—sa mga pook-pasyalan at mga lugar na malapit sa Bulkang Mayon. Binibigyang-diin ng APSEMO na ang PDZ ay itinuturing na lubhang mapanganib sa lahat ng oras dahil sa banta ng lava flow, pyroclastic density currents, rockfall, at ashfall.
Bilang bahagi ng pinaigting na mga hakbang sa kaligtasan, inatasan ang kapulisan na higpitan ang pagbabantay sa kabuuan ng Bulkang Mayon, partikular sa mga kilalang access points, trail, at mga rutang madalas daanan ng mga umaakyat. Magtatatag ng chokepoints, checkpoints, at regular na patrols upang matiyak na walang makakapasok o makakaakyat sa mga ipinagbabawal na lugar. Ang sinumang mahuhuling lalabag sa kautusan ay maaaring maharap sa kaukulang parusa alinsunod sa umiiral na mga batas at lokal na ordinansa.
Bukod dito, patuloy ang malapit na koordinasyon ng PNP sa mga lokal na pamahalaan, APSEMO, Philippine Institute of Volcanology and Seismology (PHIVOLCS), Armed Forces of the Philippines (AFP), Bureau of Fire Protection (BFP), at iba pang concerned agencies upang mapanatili ang kaayusan, masiguro ang kaligtasan ng publiko, at maging handa sa agarang pagresponde sakaling magkaroon ng biglaang pagbabago sa aktibidad ng bulkan.
Bahagi rin ng pagiging handa ng PNP Bicol ang Reactionary Standby Support Force (RSSF) sa RHQ, Albay PPO, at lahat ng nakapalibot na istasyon ng pulis sa Mayon Volcano, kabilang ang mga mobile forces, upang matiyak ang kahandaan at agarang deployment kung kinakailangan.
Hinihikayat ang publiko na makipagtulungan sa mga awtoridad, sumunod sa mga babala at advisories, at iwasan ang pagpapakalat ng maling impormasyon. Ang kaligtasan ng bawat isa ang pangunahing layunin ng pamahalaan sa gitna ng patuloy na pagbabantay sa Bulkang Mayon.
Manatiling ligtas, maging alerto, at makinig sa mga opisyal na anunsyo ng mga awtoridad.
Source: PNP kasurog Bicol