DAVAO DEL SUR – Usa ang patay ug duha ang samdan sa insidente sa pagpangluba nga nahitabo sa Purok 21, Barangay Guihing, Hagonoy, alas 4:20 sa kaadlawong Dominggo, Mayo 25, 2025.
Ang namatay giila lamang sa alyas John, 27-anyos, ulitawo, usa ka tire vulcanizer, ug residente sa Phase II Relocation. Gidala pa kini sa ospital apan gideklarar nga dead on arrival sa doktor.
Ang mga naangol giilang sila si alyas Ivann, 22-anyos, ug alyas Chillton, 25-anyos, ulitawo – mga residente usab sa maong lugar.
Sumala sa imbestigasyon sa kapulisan, nag-inom ang biktima ug ang suspek uban sa ilang mga kauban. Sa kalit nga panaglalis tali sa ilang grupo, mikalas og kontrol ang suspek ug mikuha og kutsilyo. Walay duha-duha, gisudlan niya og pangluba ang mga biktima, nga naigo sa nagkalain-laing parte sa ilang lawas.
Gisulayan pa og tabang ang mga biktima sa mga residente sa palibot ug gidala sila sa tambalanan. Apan si alyas John, tungod sa grabeng samad, wala na maluwas.
Human sa hitabo, daliang misibat ang suspek ug hangtod karon, padayon kini nga ginapangita sa mga otoridad. (Camille Santos Naraga)(Source: Contributed)