DAVAO CITY – Usa ka langyaw nga Amerikano ang namatay human maaksidente sakay sa iyang motorsiklo sa Porras corner Lakandula St., Agdao, Davao City, pasado alas 10 sa gabii, Mayo 26, 2025.
Gikumpirmang patay ang biktima nga giilang si Richard (gitago ang tibuok pangalan), temporaryong nagpuyo sa Linmar Tower, human mabangga ang railings samtang nagmaneho sa iyang Honda ADV L102M.
Matud sa gwardya nga nakasaksi sa insidente, pasulod na sa apartelle ang biktima apan kusog ang dagan sa iyang motor. Nilikay siya sa usa ka pickup truck nga misulod sa parking area ug dihang wala na siya makapugong, nabangga ang railings ug naparok ang ulo sa semento.
Gisuwayan pa og tabang ang biktima sa 911 emergency responders apan gideklarang patay pag-abot sa SPMC.(Camille Santos Naraga)(Source: DCPO)