Cagayan de Oro City – Moabot sa 119 ka mga piniriso ug usa ka jail officer ang natakbuyan sa Covid-19 sa Bureau of Jail Management and Penology’s facility sa barangay Lumbia ning dakbayan sud lamang sa duha ka semana. Kini human adunay nadugang nga 41 ka piniriso apil na sa usa ka babaye ang nagpositibo niadtong adlawng sabado.
Matud pa ni Dr. Joselito Retuya, Jr ang resident epidemiologist sa City Health Office, nga base sa pandemic response update sa city hall nga ang 41 ka mga binilanggo apil na sa 62 nga nainfected nga maoy nakapahimo sa cumulative total ngadto sa 1,439 nga Covid-19 cases.
Kahinumduman nga niadtong Oktubre 6, gikataho nga adunay 28 ka binilanggo ang natakbuyan sa virus ug gipahimutang sa temporary treatment ang monitoring facility sa BJMP sa Lumbia. Ang infections nakuha tapos ang 221 ka mga detainees gikan sa selda sa police stations gidala sa BJMP facility samtang nagpaabot sa commitment orders gikan sa korte alang sa mga krimen nga gi-akusar kanila.
Sa 221 ka mga inmates nga gi-swab, 112 ang nagpositibo ug 98 ang asymptomatic, matud pa ni Dr. Ted Yu, ang medical officer sa City Health Office nga gitahasan paglantaw sa kahimtang sa panglawas sa mga jail officers ug inmates. Gisugilon ni Yu nga adunay 13 ang nakarecover apan 99 ang nagpabiling positibo sa ilang follow-up swabbing.
Sa pikas bahin, si Jail Chief Supt Ester Galvez Pepito, ang director sa BJNP-Region 10 mibutyag sa iyang post online nga tanang prisohan sa Northern Mindanao ang gipahimutang sa lockdown sukad niadtong Marso 20, lima ka adlaw tapos ang Presidente mideklara sa state of health emergency.
(City Information Office)