Dili ikalalis nga ang probinsya sa Misamis Oriental abunda sa kinaiyahan nga maoy garbo sa natad sa turismo nga gikahinaman sa mga turista mapa lokal man o internasyonal.
Subay niini, ang Provincial Inter Agency Task Force sa Misamis Oriental nga gipanguluhan ni Dr. Jerie Calingasan lig-on nga misuporta sa programa ni Governor Bambi Emano nga turismo nga plano nga pagabuksan ang maong sektor karong umalabot bulan sa Disyembre pinauyon gihapon sa pagsunod sa mga health protocols.
Kanunay man nga gasaka ang mga kaso sa COVID-19 sa nasud, kanunay sab nga gaubos ang mga kaso sa probinsya hinungdan nga ang turismo sa Misamis Oriental adunay dakong potensyal nga manumbalik sa kaniadto niining kabaskog inubanan lamang sa pagsunod sa mga gabayan nga gipahimangno sa nasyonal ug probinsyal nga IATF.
Gipahimangnuan ni Dr. Calingasan ang publiko hilabina ang mga Misamisnons sa mga angay buhaton ayha pagabuksan balik ang turismo sa probinsya karong umalabot Disyembre.
Una, iyang gidasig ang mga Misamisnon nga magpabakuna, ikaduha, kinahanglan nga andamon ang katawhan pinaagi sa pag-proteher sa matag usa batok sa virus.
Sa planong pagbukas sa industriya sa turismo sa probinsya, daghang mga kinabuhi ang mabag-o hilabina nga makahatag kini og panginabuhian ug trabaho sa lokalidad aron nga makasugakod sa gisagubang nga pandemya.
Sa dakong pagsalig ug sa pag-implementar sa mga Health Protocols, ang pagbukas sa industriya sa turismo sa probinsya mamahimong usa ka dakong oportunidad alang sa katawhan sa ilang panginabuhian nga gikinahanglang lamang ubanan sa disiplina ug dili pagkumpiyansa ug pinaagi niini walay rason nga dili magmalamboun ang matag Misamisnon.
(Source: Misamis Oriental Provincial Information Office Facebook page)