Pursigido ni Gob. Matthew Marcos Manotoc a mangipatungpal ti ‘’sports tourism’’ ditoy Ilocos Norte.
Daytoy ti kinumpirmaran ti gobernador iti pannakiinuman kenkuana dagiti kameng ti Phil. Sportswriters Association.
Impalgakna a napinget ti kalikagumna a mapagbalin ti Ilocos Norte nga sports capital iti amianan a Luzon.
Mainaig iti daytoy, kunana nga iti agdama ket mannarimaan ti panangisagana ti gobierno probinsial kadagiti pasilidad iti benneg ti sports ken iti panag-host ti probinsia kadagiti babassit nga events wenno kompetision.
Inlawlawagna nga apaman nga agbalin a normal ti sitwasion ket namnamaenna a maikkan ti gundaway ti Ilocos Norte nga aghost iti national ken international events ken mausar ti Laoag International Airport.
Immune-una ngem iti daytoy, nadakamat ti gobernador nga apaman a maileppas ti pannakaipasdek ti baro a Marcos Stadium ket ad-addanton a nakasagana ti probinsia nga aghost kadagiti dadakkel nga event iti lubong ti sports. (Cita Macalipis, RPN DZRL Batac Correspondent)
(Source: Provincial Government of Ilocos Norte)