Cebu City – Miluwat na og kamandoan si Cebu City Mayor Edgardo Labella sa kapolisan pag-imbestigar ug pagtangtang sa mga illegal outlet sa STL o small town lottery sa Brgy. Carreta.
Una niini, gisuwatan ni Kapitan Marciano Ando ang mayor bahin sa daghang STL outlets nga naglihok sa barangay bisag walay permit gikan sa PCSO o Philippine Charity Sweepstakes Office.
Atol sa ilang sesyon, nasayran nila ni Ando ug mga kagawad gikan sa PCSO nga ang maong mga outlets nakalapas sa closure order ni Pres. Rodrigo Duterte niadtong 2019.
Base sa iyang suwat, gihangyo ni Ando si Labella pagtabang og gukod sa naasoyng mga pasugalan ug pagtangtang niini sa ilang lugar kay naglisod sila paghimo sa ingon tungod sa mga estorya nga adunay mga opisyal nga nagdawat og payola gikan sa maong mga establisimento.
Apan sila si Ando ug mga sakop sa konseho kusganong misalikway sa pasangil.
Agig tubag, gimandoan sa mayor ang director sa CCPO, Col. Josefino Ligan, pagpuhag sa nahisgotang mga STL outlets.
Apan dili lang sa Carreta ang buot malimpiyo sa mayor sa illegal gambling kon dili hasta ang ubang barangay nga gitaho nga duna poy outlet sa STL. (Jhon Tadlip/JTY)
(Source: Cebu City Public Information Office, photo courtesy of contributed & internet)