Inpakaammo ni Provincial Veterinarian Dr. Loida Valenzuela a sipud natapugan ti tawen 2021 ket addan ti tallo a samples dagiti kimmagat nga aso a naipadanon iti opisina.
Mainaig iti daytoy, impalgakna a dua kadagitoy ti saanda pay a naeksamen gapu ta iyur-urayda ti technician ti microscope a pakaadalan ti “sample”.
Inlawlawagna a msapul a ti technician ti nakagatangan ti microscope ti mangsukat iti mercury lamp a kasapulan ti fluorescent antibody microscope.
Pakaseknan daytoy, inbunannagna a kinasaritana ti maysa a gayyemna iti region tapno idiay pay laeng a maipatulod dagiti sample.
Imbatadna a maiproseso iti Provincial Veterinary Office ket kalpasanna ket maipatulod idiay Santa Barbara, Pangasinan.
Mainaig iti daytoy, nagpadispensar ni Valenzuela kadagiti dua nga akin aso kadagiti sample nga adda iti opisinada.
Innayonna a paset daytoy iti kalikagum ti opisinada a ti agbalin a resulta ti eksaminayon ket umno ken husto.
(Ronald Domingo, RPN DZRL Batac Correspondent)
(Source: Provincial Government of Ilocos Norte)