Cebu City – Nailhan na ang tawo nga nag-vandalize sa decals o artworks nga gipatapot sa mga haligi sa Marcelo Fernan Bridge sa brgy. Pusok, Lapu-Lapu City.
Nasuta ni Mayor Junard “Ahong” Chan nga ang tawo nga miguba ug milangkat sa gama sa arte nga naghubit sa kinabuhi ni Datu Lapu-Lapu usa ka babaye nga gibanabanang nag-edad og 20 nga wala sa hustong pangisip.
Suma pa ni Chan, ilang namay-ongan ang babaye pinaagi sa footage sa CCTV nga ilang nakuha ug gikompirmar usab sa mulupyo nga nakakita sa insidente.
Tungod niini, matod ni Chan, maglisod sila pagsang-at og kaso batok sa maong binuhat.
Nunotniini, gipahibawo ni Chan nga iyang gimandoan ang kapolisan ug kadagkoan sa barangay pagpabantay sa lugar aron wala nay manghilabot sa ubang artworks nga gipatapot sa mga haligi sa tulay.
Sa nasayran, nadiskobrehan ang pagguba sa decals niadtong Abril 7 nga nakuha sa usa sa mga CCTV camera sa lugar.
Apan ang maong footage hanap ug dili igo nga makaila sa vandal hinungdang nakatanyag si Chan og gantinga ₱ 10,000 sa makatudlo ug makaingon sa pagkasikop sa suspetsado. (Jhon Tadlip/JTY)
(Source: Lapu-Lapu City Public Information Office, photo courtesy by Junard Chan)