Cebu City – Miabot na ngadto sa 1,617 ang gidaghanon sa mga naulian nga pasyente sa Covid 19 sa dakbayan sa Mandaue tungod sa nadugang nga napu.
Segun sa report nga gi-post sa PIO o Public Information Office, aduna nay 336 ka aktibong kaso sa virus ang maong siyudad tungod usab sa nadugang nga napu sa samang adlaw.
Pagka karon, ang recovery rate sa Mandaue anaa na sa 79.46 porsyento samtang ang mga namatay nagpabilin sa 82.
Nag-una sa mga nakarekober ang brgy. Tipolo nga mitala og lima; ug tagsa sa Alang-alang, Cabancalan, Cambaro, Maguikay, ug Subangdaku.
Samtang sa bag-ong mga nataptan, nag-una ang brgy. Canduman nga adunay duha; ug tagsa sa Casili, Tabok, Pagsabungan, Jagobiao, Subangdaku, Tipolo, Cambaro, ug Opao.
Ang bag-ong mga masakiton, nag-edad og gikan sa 21 ngadto sa 79.
Subay niini, matod sa PIO, ang mga sakop sa CDRRMO mihimo na sa decontamination sa mga dapit gigikanan sa mga pasyente ug contact tracing sa ilang mga gikahugoy-hugoy. (Jhon Tadlip/JTY)
(Source: Mandaue City Public Information Office)